"Si Manang sa Kadalanan"

Unsa kahay sulod ana iyang gipas-an?

bililhon ba kaha kana nga iya man gayod gitipigan

nagbaktas ra gayod sya sa kadalanan

giantos ang kainit sa adlaw nga hilabihan

wala panumbalinga ang abog sa mga sakyanan

ug mga pagbiay-biay nga iyang masugatan

si manang nga adunay kaugalingon nga kalibutan

wala nahadlok sa mahimo niyang dangatan

sulod niining maabog ug samok nga kadalanan

sa matag karon ug unya iya gayod gitinguha

nga mahatagan ug katumanan iyang gipangita

wala sya makahibalo ug para asa ang iyang gipanguha

pero para kaniya usa kini ka bililhon nga iyang gipanag-iya

ang buyot nga iyang dala sa kalit napuno na

nagkabibi na si manang sa iyang dala

apan wala gihapoy timailhan nga siya gikapoy na

kang manang ako midayeg ug taman

wala sya'y labot sa lihok sa uban

bisan unsa pa ang ilang mahuna-hunaan

basta sya padayon sa paglaroy-laroy ning maong kadalanan

ang uban makaingon nga sya usa ka buang

nawala sa maayong panabot maong ingon-ani na ang binuhatan

unsa kaha ang dakong hinungdan?

nga si manang sa kalsada naka kita mang ug kalingawan

anaa ba kaha sya'y kabanay

mga anak anaa ba kaha aron sa kaniya moagakay?

buhi pa ba gihapon ang pamilya niyang gipangandoy?

ug nga andam ba kaha sila sa kaniya mo unong sa ka pordoy?

unsa man kaha ang nahimong kinabuhi niya kaniadto?

sa maayong kahimtang sya ba kaha nagtubo

unsa man kaha ang nahimo niyang kasaypanan

nganong sa maong pagkabutang siya nag-antos na lang

sa kalipay siya ba kaha nakaangkon

wala ba kaha siya kabuangi sa iyang isig ka ingon?

ang mga kagul-anan ug kasaypanan iya ba usab kaha nga naagian?

ug ang pagkaharuhay sa kinabuhi iya ba kahang natilawan?

imong makita sa kahimtang ni manang

nga sya nalingaw sa iyang giatiman

asa kaha ang padulngan sa maong mga butang nga gipamunit ni manang

sugo ba gayod kini sa iyang alimpatakan

o usa ba kini sa iyang kinaiyahan

kalooy sud-ongon ni manang

bisan sa kalayo sa iyang gibaktasan

wala gayod batia ug kapakyasan

tungod sa matag lugar nga iyang maadtoan

sigurado nga anaa sya'y mapunit ug mahimo niyang kapa ingnan

ang kinabuhi ni manang dili man usa ka sulondon

ug nga lisod kaayo kingin sutaon

apan ang panginabuhi ni manang sa matag adlaw

usa ka ehemplo nga atong mamatikdan

sa iyang pag-antos sa kadalanan

mao ang nahimo niyang kalingawan

wala makataak sa tawhanong katungod si manang

apan angay siya nato nga kaloy-an

dili dautan ang pag laroy-laroy sa kadalanan

apan angay usab nga anaa siyay pasilungan

busa angay kitang tanan muagakay kang manang

nga nabuhi lamang diha sa kadalanan...